काठमाडौं । नागढुङ्गा नजिकै झ्याप्ले खोलामा एउटा बस र माइक्रोबस पुरिँदा १४ जनाले ज्यान गुमाएका छन्। सशस्त्र प्रहरीका सहायक प्रवक्ता डिएसपी शैलेन्द्र थापाका अनुसार यी शवहरू पहिरोमा परेको गाडीबाट निकालिएको हो। गाडीबाट आठ पुरूष, पाँच महिला र एक बच्चाको शव निकालिएको उनले जानकारी दिए।

धादिङमा पर्ने उक्तस्थानमा शनिबार बिहान दुई सवारी साधन पहिरोले पुरेको थियो ।

पहिरो पन्छाएर लु‍‍.१ ज ४५७८ नम्बरको माइक्रो बसबाट ५ जना र बसबाट ९ जनाको शव निकालिएको प्रहरीले जनाएको छ । बसको नम्बर भने खुलेको छैन ।

जिल्ला प्रहरी परिसर काठमाडौंका अनुसार घटनास्थलमा प्रहरी वृत थानकोटका डीएसपी सुर्यप्रसाद सुवेदी नेतृत्वको टिम खटिएको छ ।

ती बसहरु शनिबार साँझ एक्साभेटरको सहायताले निकालिएको थियो । अरु सवारी साधन पनि पुरिएको आशंकामा खोजी कार्य जारी छ ।