काठमाडौं ।
काभा महिला भलिबल नेसन्स लिगमा नेपालले माल्दिभ्समाथि सहज जित निकालेको छ ।
सोमबार त्रिपुरेश्वरस्थित राखेपको कभर्ड हलमा भएको खेलमा नेपालले माल्दिभ्सलाई ३-० को सोझो सेटमा पराजित गरेको हो । नेपालले माल्दिभ्सलाई २५-८, २५-१९ र २५-१८ को सेटमा पराजित गरेको हो ।
योसँगै लिग चरणमा दोस्रो स्थानमा रहेको नेपालले सेमिफाइनलमा तेस्रो स्थानको इरानसँग प्रतिस्पर्धा गर्नेछ । तालिकाको शीर्ष स्थानमा रहेको भारतले भने सेमिफाइनलमा श्रीलंकाको सामना गर्नेछ । सेमिफाइनलको पहिलो खेलमा मंगलबार दिउँसो ३ बजे भारतले श्रीलंकाको सामना गर्नेछ ।
यस्तै, दोस्रो सेमिफाइनलमा साँझ सवा ५ बजे नेपालले इरानको सामना गर्नेछ । यसअघि लिग चरणको खेलमा नेपाल इरानसँग ३-२ को सेटमा पराजित भएको थियो । यसअघि सोमबारै भएको पहिलो खेलमा भारतले श्रीलंकालाई २५-१३, २५-२१ र २५-२० को सोझो सेटमा पराजित गरेको थियो ।
