काठमाडौं । पहिलो सेमिफाइनलमा क्यानडाविरुद्ध २–० को जित निकाल्दै साविक विजेता अर्जेन्टिना कोपा अमेरिका–२०२४ को फाइनलमा प्रवेश गरेको छ ।
बुधबार अमेरिकाको मेटलाईफ रंगशालामा भएको खेलमा अर्जेन्टिनालाई फाइनल पूर्याउन हुलियन आल्भारेज र कप्तान लियोनल मेसीले गोल गरे । अर्जेन्टिनाले पहिलो र दोस्रो हाफमा समान एक गोल गरेको हो ।
मेटलाईफ रंगशालामा उपस्थित ८० हजार १०२ जना दर्शकमाझ आल्भारेजले २३औँ मिनेटमा गोल गर्दै अर्जेन्टिनालाई अग्रतामा राखेका थिए । रोड्रिगो डि पाउलले मैदानको मध्यभागबाट निकालेको पासलाई नियन्त्रणमा राख्दै आल्भारेजे १८ यार्ड बक्सभित्रबाट गोल क्यानडाको गोलकिपरलाई ‘बिट’ गरेका थिए । अर्जेन्टिनाबाट ३५ खेल खेलेका आल्भारेजको यो नवौँ अन्तर्राष्ट्रिय गोल हो ।
यस्तै, ५१औँ मिनेटमा कप्तान मेसीले गोल गरेपछि अर्जेन्टिनाले अग्रता दोब्बर बनाएको थियो । जारी प्रतियोगितामा मेसीको यो पहिलो गोलसमेत हो । यो गोलसँगै मेसी अन्तर्राष्ट्रिय फुटबलमा दोस्रो सबैभन्दा धेरै गोल गर्ने खेलाडी बनेका छन् । मेसीले इरानका अली दाई (१०८) लाई उछिनेका हुन् । मेसीले हाल अन्तर्राष्ट्रिय खेलमा १०९ गोल पूर्याएका छन् । मेसीअघि रहेका पोर्चुगलका कप्तान क्रिस्टियानो रोनाल्डोले १३० गोल गरेका छन् ।
मेसीपछि यसपछि थप गोल हुन नसक्दा अर्जेन्टिनाले २–० को जितसहित लगातार दोस्रो पटक प्रतियोगिताको फाइनलमा स्थान बनाएको हो । १५ पटकको च्याम्पियन अर्जेन्टिना समग्रमा ३०औँ पटक कोपा अमेरिकाको फाइनलमा प्रवेश गरेको हो ।
अर्जेन्टिनाले प्रतियोगिताको पछिल्लो आठ संस्करणमध्ये छैटौँ पटक फाइनलमा स्थान बनाएको हो । यसअघि २०२१ मा भएको प्रतियोगिताको फाइनलमा ब्राजिललाई हराउँदै अर्जेन्टिना च्याम्पियन बनेको थियो ।
अर्जेन्टिनाले अब उपाधिका निम्ति उरुग्वे र कोलम्बियाबीचको विजेतासँग प्रतिस्पर्धा गर्नेछ ।
