काठमाडौं । आईसीसी ट्वान्टी २० विश्वकपको पहिलो सेमिफाइनलमा अफगानिस्तानविरुद्ध नौ विकेटको सहज जित निकाल्दै दक्षिण अफ्रिका फाइनलमा प्रवेश गरेका छ ।
बिहीबार टारोउबामा सम्पन्न खेलमा अफगानिस्तानले प्रस्तुत गरेको ५७ रनको झिनो लक्ष्य दक्षिण अफ्रिकाले ८.५ ओभरमा एक विकेट गुमाएर पूरा गर्यो ।
दक्षिण अफ्रिकाको जितमा रिजा हेन्ड्रिक्स र कप्तान आइदेन मार्करमले अविजित क्रमशः २९ र २३ रन थपे । ओपनर क्विन्टन डी कक भने पाँच रनमा पभेलियन फर्किएका थिए ।
अफगानिस्तानका लागि एकमात्र विकेट फजलहक फारुकीले लिए ।
त्यसअघि टस जितेर ब्याटिङमा उत्रिएको अफगानिस्तान ११.५ ओभरमा ५६ रनमै समेटिएपछि दक्षिण अफ्रिकाले ५७ रनको सामान्य लक्ष्य पाएको थियो ।
अफगानिस्तानका अज्मतुल्लाह ओमरजाईले १० रन जोडे । यसबाहेक, अन्य ब्याटर दोहोरो अंकको रनसम्म पुग्न सकेनन् ।
अफगानिस्तानलाई झिनो योगफलमा रोक्न दक्षिण अफ्रिकाका मार्को जान्सेन र तबरेज साम्सीले समान तीन विकेट लिए । कगिसो रबाडा र एनरिक नोर्ट्जेको नाममा समान दुई विकेट रह्यो ।
दक्षिण अफ्रिकाले अब विश्वकपको उपाधिका निम्ति भारत र इंग्ल्यान्डबीचको विजेतासँग खेल्नेछ । दोस्रो सेमिफाइनल खेल पनि आज राति नै हुने तालिका छ । प्रतियोगितामा दक्षिण अफ्रिका सुपर–८ को समूह–२ को विजेता र अफगानिस्तान भने समूह–१ को उपविजेताको रुपमा सेमिफाइनल आएका थिए ।
