सिन्धुपाल्चोक ।
देशमा जातीय मुद्दा उठीरहेको छ । कतै गैर दलितले दलित समुदायका व्यक्तिहरूलाई कोठा समेत नदिएको खवरहरू सुनिरहेका बेला सिन्धुपाल्चोकको चौतारा–साँगाचोकगढी नगरपालिकाले भने यस क्षेत्रमा उदाहरणीय काम गरेको छ । सिन्धुपाल्चोकको चौतारा–साँगाचोकगढी नगरपालिकाले अन्तरजातीय विवाह गर्ने दुई जोडीलाई नगद सहित सम्मान गरेको छ ।
अन्तरजातीय विवाहकै कारण समाज तथा परिवारमा विभेदको समस्या खेपीरहेका उदाहरणहरू प्रशस्तै छन् । यस्ता घटनाका बावजुत पनि अन्तरजातीय विवाह गरेका चौतारा साँगाचोकगढी नगरपालिका–९ का युनिक विक पोखरेल र राधिका गिरी, वडा नं. ५ का कृष्ण विक र शर्मिला नेपालीलाई नगद पाँच/पाँच हजारसहित नगरप्रमुख अमानसिं तामाङले सम्मान गरेका हुन् । समाजमा जातीय विभेद अन्त्य गरी सबै मानव समान हुन् भन्ने सन्देश प्रवाह गर्दै कोही मानिस अछुतो छैन भन्ने संकेतको रूपमा सम्मान कार्यक्रमको आयोजना गरिएको हो ।
नगरस्तरीय दलित समन्वय समितिको आयोजनामा भएको कार्यक्रममा दलित समुदायबाट शहिद हुने गोरेबहादुर पुर्कोटी, मोहन विक र निरबहादुर विकको परिवारलाई पनि पाँच/पाँच हजारसहित सम्मान गरिएको थियो ।
